Бүгін мектебімізде ұлт ұраншысы, Алаш қайраткері, қазақ әдебиетінің көрнекті өкілі Міржақып Дулатұлының 140 жылдық мерейтойына арналған облыстық ғылыми іс-тәжірибелік конференция өтті. Жалпы конференцияға облыс бойынша 99 жұмыс қабылданып, оның 41-і әділ қазылар алқасының оң бағасын алып, секциялық жұмыс барысында таныстырылды.

Педагогтар Міржақып Дулатұлының өмір жолы, шығармашылығы, ағартушылық қызметі және Алаш қозғалысындағы рөлі жөнінде тың баяндамалар ұсынды. Сонымен қатар, тұлғаның ұлттық сананы оятудағы еңбегі, «Оян, қазақ!» идеясының тарихи маңызы жан-жақты талқыланды.

Конференцияның пленарлық отырысына арнайы шақырумен Қостанай облысы әкімдігі мәдениет басқармасының «Торғайдың Жангелдин мұражайлар кешені» КММ-сі кешен басшысы Сәрсекей Гүлбану Құлетқызы, Рудный қалалық құрмет тақтасының иегері, Рудный ҚХА ақсақалдар кеңесінің төрағасы, ақын, қара сөз қаламгері Тілеуғабылов Жаңбыршы Тұқатұлы, Қазақстан Жазушылар одағы Балалар мен жасөспірімдер әдебиеті жанрлық кеңесінің төрағасы, жазушы, алаштанушы, @atacreativehub баспасының бас редакторы Елдос Нүсіпұлы Тоқтарбай, философия ғылымдарының кандидаты, доцент, М. Дулатұлы атындағы Қостанай инженерлік-экономикалық университетінің оқытушысы Абдрахманова Райхана Казикановна қатысты.

Сонымен қатар, 2022 жылы мектебімізге Алаш зиялысының есімі берілген сәттен бастап, мектепте ұлы тұлғаның есімін дәріптеуге қала, облыс, республика деңгейінде ұйымдастырылған рухани-мәдени іс-шаралар жөнінде баяндалды. Солардың бірі – Абзал Әміржанұлының бастауымен 2023 жылы Міржақып Дулатұлының туған жеріне, Торғай өңіріне оқушылар мен педагогтарға экспедиция ұйымдастырылуы. Ағымдағы жылы мерейтой қарсаңында мектепте Міржақып Дулатұлының мұражайы ашылғаны аталып өтті.

Конференцияға қатысушылар ұлт мұрасы – ұлы тұлғаларды дәріптеу, олардың арман-мұратын бүгінгі ұрпақпен сабақтастырудың маңызын ерекше атап өтті. Осындай тағылымды іс-шаралар ел азаматтарының тарихи санасын кеңейтіп, өз елін, мәдениетін және мұрасын қадірлейтін азамат болып қалыптасуына ықпал етеді.

Конференция соңында үздік жұмыс атанған қатысушылар облыстық білім басқармасының дипломымен марапатталды.

Міржақып Дулатұлының мұрасы – мәңгілік аманат!